SUBVENCIÓNS PARA ACCIÓNS FORMATIVAS DE PERSOAS  TRABALLADORAS OCUPADAS

Estas axudas teñen como finalidade mellorar as competencias profesionais das persoas traballadoras ocupadas, facilitando a súa adaptación ás necesidades do mercado laboral e promovendo a súa cualificación ou recualificación. A concesión das axudas realízase en réxime de concorrencia non competitiva, atendendo á orde de presentación das solicitudes ata esgotar o orzamento dispoñible.

BENEFICIARIOS

Poderán solicitar estas axudas as empresas e entidades sen ánimo de lucro que estean inscritas no Rexistro de Centros e Entidades de Formación da Comunidade Autónoma de Galicia ou, no caso de teleformación, no correspondente rexistro estatal e queimpartan en Galicia as ofertas formativas do sistema de formación profesional dos graos A, B e C e/ou as competencias clave para as que soliciten subvención, xa sexa en modalidade presencial ou virtual.

OBRIGAS

As entidades deberán cumprir ademais cunha serie de requisitos:

• Dispor das instalacións debidamente homologadas que permitan a impartición das actividades presenciais das accións formativas.
• As entidades que soliciten impartir formación virtual deberán contar con autorización previa para a impartición das mesmas ofertas na modalidade presencial.
• Contar co permiso de participación do número mínimo de persoas traballadoras ocupadas que se determine.
• Dispor e manter durante todo o período de execución da formación a capacidade suficiente (técnica, de recursos humanos, materiais e organizativos, etc.) para asumir a xestión e impartición das accións formativas solicitadas.

DESTINATARIOS DAS ACTIVIDADES FORMATIVAS

As persoas destinatarias da formación serán as persoas traballadoras ocupadas. As persoas traballadoras ocupadas que se queden en desemprego  mentres están realizando a formación poderán seguir participando na acción formativa que están cursando. 

Con respecto ao número de participantes por acción formativa, atopámonos cos seguintes marxes:

• Accións formativas en modalidade presencial: mínimo 10 persoas e máximo 15.

Accións formativas en modalidade virtual: mínimo 15 persoas e máximo 30.

PRAZO

O prazo para a presentación de solicitudes comeza o 5 de febreiro de 2025 e remata o 30 de setembro de 2025.

MÁIS INFORMACIÓN

Consulta a  ORDE do 12 de decembro de 2024 pola se efectúa a segunda convocatoria de subvencións, en réxime de concorrencia non competitiva, para o financiamento de accións formativas do Sistema de formación profesional dos graos A, B e C, e competencias clave, destinadas a persoas traballadoras ocupadas, para o exercicio 2025 (código de procedemento TR301X).

CÓDIGO DE PROCEDEMENTO:  TR301X

Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.

O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.