A finalidade desta orde de subvencións é impulsar a innovación, a dixitalización e a sustentabilidade no comercio local e artesanal en Galicia. Búscase mellorar a competitividade dos pequenos comercios e os obradoiros artesáns mediante a modernización, a implantación de novas tecnoloxías e o fomento da sustentabilidade ambiental e, ao mesmo tempo, apoiar a adaptación do sector aos novos hábitos de consumo e ás necesidades do mercado actual.
BENEFICIARIOS
Persoas físicas (autónomas) ou xurídicas, comunidades de bens ou calquera outro tipo de unidade económica ou patrimonio separado sen personalidade xurídica, que sexan comerciantes retallistas ou obradoiros artesanais e que cumpran ademais unha serie de requisitos:
Comercios retallistas
- Que a actividade comercial se desenvolva en Galicia, que o domicilio social radique en Galicia e que cumpran os requisitos para exercer a actividade.
- Que, tendo a condición de PEME, non teñan máis de vinte (20) persoas empregadas, incluídas as persoas en situación de autoemprego.
- Que estean dados de alta nalgunha das epígrafes do IAE relacionados nos anexos II e III da orde, e que esta constitúa a actividade para a cal vai dirixida a subvención, sendo ademais a actividade principal. Se a actividade para a que se pide subvención é unha das do anexo III, deberá estar dado de alta tamén nunha actividade relacionada no anexo II.
- Que teñan un establecemento comercial cunha superficie de exposición e venda igual ou inferior a 300 metros cadrados, agás que a actividade comercial se encadre na epígrafe 653.1 do IAE.
Obradoiros artesáns
Que estean inscritos no Rexistro Xeral de Artesanía de Galicia. No caso de novos obradoiros, poderán solicitar a inscrición no rexistro ata o 26 de marzo de 2025.
ACTIVIDADES E CONTÍA SUBVENCIONABLES
1. Liña de dixitalización e innovación comercial
Accións enfocadas á dixitalización do entorno comercial online, así como na transformación dixital do punto de venda e do modelo de negocio.
A porcentaxe da subvención será o 80 %, tendo en conta os seguintes investimentos máximos subvencionables por actuación (IVE excluído):
| Actuación subvencionable | Investimento máximo subvencionable |
|---|---|
| Implantación ou mantemento de páxina web con ou sen venda en liña. | 1.200,00 € |
| Hardware (sistema TPV ou tableta), impresora de código de barras térmica 1D/2D e báscula dixital | 1.200,00 € |
| Software de xestión adaptado á actividade comercial desenvolvida | 8.000,00 € |
| Ferramentas de posicionamento dixital (SEO, SEM, ADS) | 2.500,00 € |
| Loxística e-commerce | 900,00 € |
| Xestor de redes sociais e imaxe dixital | 1.500,00 € |
| Etiquetaxe electrónica para lineais de venda | 5.100,00 € |
| Sistemas de click and collect e lockers dixitais | 4.250,00 € |
| Terminais de autopagamento para a clientela (self check out) | 4.250,00 € |
| Solucións de ciberseguridade | 1.700,00 € |
| Asistentes virtuais e sistemas dixitais interactivos (chatbots) | 850,00 € |
| Aplicacións para dispositivos móbiles (m-commerce) | 2.550,00 € |
| Aplicacións de realidade virtual e aumentada | 2.550,00 € |
| Pantallas e escaparates virtuais con ou sen interacción coa clientela | 7.200,00 € |
| TOTAL | 43.750,00 € |
2. Liña de modernización comercial
Actuacións dirixidas á mellora da imaxe, á eficiencia do local e dos recursos e á calidade do produto final.
A porcentaxe da subvención será o 80 % do investimento, cos seguintes investimentos máximos subvencionables (IVE excluído):
| Actuación subvencionable | Investimento máximo subvencionable |
|---|---|
| Obras de acondicionamento e reforma da superficie de exposición e venda do establecemento comercial, adquisición de moblaxe auxiliar destinada á mellora da imaxe comercial e adquisición de moblaxe expositivo de produtos | 5.250,00 € |
| Servizos profesionais de elaboración e redacción do proxecto de interiorismo e decoración | 2.000,00 € |
| Portas automáticas con sensores de proximidade | 2.000,00 € |
| Sistemas de iluminación enerxeticamente eficientes e sensores de presenza para a regulación automática de luces | 2.000,00 € |
| Sistemas de climatización enerxeticamente eficientes | 5.000,00 € |
| Actuacións de mellora da fachada e illamento térmico e acústico e colocación de toldos e rótulos do establecemento comercial | 2.000,00 € |
| Adquisición de equipamentos propios da actividade comercial e artesanal | 6.000,00 € |
| TOTAL | 24.250,00 € |
3. Liña de sustentabilidade ambiental
Actuacións dirixidas á redución das cantidades de embalaxe mediante a adaptación do seu tamaño e forma á dimensión e formato dos produtos:
- Caixas de cartón 100 % reciclado.
- Sobres de cartón ou papel 100 % reciclado.
- Papel vexetal.
- Recheos para embalaxe (recheos vexetais e proteccións acolchadas de papel 100 % reciclado).
- Bolsas de papel 100 % reciclado.
- Bolsas de tea de algodón 100 %.
- Bolsas de tea de liño 100 %.
- Bolsas de tea de cánabo 100 %.
A porcentaxe da subvención será o 80 % do investimento, cun máximo subvencionable de 2.500,00 € (IVE excluído).
PRAZO
O prazo de solicitudes comezará o 26 de febreiro e rematará o 26 de marzo de 2025.
A TER EN CONTA
Non poderán acceder a estas subvencións os comercios sen tenda física.
Non serán subvencionables, entre outros, a adquisición de ordenadores, dispositivos móbiles, televisores e adquisición de maquinaria propia da actividade para os obradoiros artesáns.
Os investimentos deberán estar realizados e pagados entre o 01/12/2024 e o 30/09/2025.
Non serán subvencionables actuacións cun investimento inferior a 1.000 €.
Obriga de manter os investimentos subvencionados na empresa, aplicados á finalidade para a que se solicitaron, durante un prazo de 2 anos desde a concesión.
As axudas resolveranse en réxime de concorrencia non competitiva, por orde de entrada no rexistro da solicitude, ata o esgotamento dos fondos.
MÁIS INFORMACIÓN
Código de procedemento: CO300C
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación terá unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.