Subvencións ás actividades de distribución para industrias culturais

A través desta convocatoria da Axencia Galega das Industrias Culturais (AGADIC) establécense as condicións para a concesión de axudas que fomenten a distribución tanto nacional como internacional de bens e servizos culturais, especificamente para empresas relacionadas coas artes escénicas e/ou musicais. A convocatoria busca aumentar a demanda de produtos culturais na sociedade galega e tamén apoiar a promoción e distribución destes produtos culturais producidos por compañías, profesionais e artistas galegos  no exterior.

Encádranse dentro desta orde, dúas modalidades de proxectos a subvencionar:

• Artes escénicas
• Música+

BENEFICIARIO

• Persoas autónomas ou persoas xurídicas privadas.
• Agrupacións de persoas físicas ou xurídicas privadas, comunidades de bens ou calquera outro tipo de unidade económica ou patrimonio separado que, aínda sen personalidade xurídica, poidan levar a cabo as actividades obxecto da subvención.

Requisitos adicionais:

• Que se dediquen profesionalmente á actividades de produción e distribución de espectáculos e artes escénicas ou musicais.
• Que desenvolvan maioritariamente a súa actividade en Galicia
• Que teñan domicilio ou sucursal en Galicia ou non territorio da Unión Europea ou asociado ao Espazo Económico Europeo.

Non poderán ser beneficiarias desta convocatoria as asociacións e restantes entidades sen fins de lucro.

MODALIDADE E PROXECTO SUBVENCIONABLES

Artes escénicas

A.1. Subvencións para a distribución de espectáculos fóra de Galicia

Para empresas que presenten un proxecto de distribución a nivel nacional ou internacional consistente na realización dun mínimo de catro funcións en tres espazos escénicos distintos como mínimo e en ningún caso máis de catro no mesmo espazo escénico.

A.2. Subvencións para a representación de espectáculos en feiras e festivais fóra de Galicia

Para empresas que presenten un proxecto exhibición de espectáculos en feiras ou festivais do sector das artes escénicas celebrados fóra de Galicia.

A.3. Subvencións para a asistencia a feiras e mercados de artes escénicas fóra de Galicia.

Para empresas que presenten un proxecto consistente na asistencia das empresas solicitantes ás feiras e mercados que se celebren fóra da Comunidade Autónoma de Galicia para dar visibilidade aos proxectos que representan. Non se subvencionarán máis de dúas persoas por entidade solicitante e evento.

A.4. Subvencións para a distribución interior de espectáculos escénicos no territorio da Comunidade Autónoma.

Para empresas que presenten un proxecto de distribución de espectáculos de artes escénicas pola CCAA de Galicia, cos seguintes requisitos:

• En espazos de titularidade pública, excluídos os espazos adheridos á Rede galega de teatros e auditorios, o número mínimo por proxecto será de cinco representacións e, en ningún caso, o mesmo espazo poderá acoller máis de tres representacións.
• En espazos de titularidade privada só se poderán considerar dúas representacións.

Todas as representacións que conformen o proxecto terán que ter contraprestación económica, sexa mediante caché ou billeteira.

Música

B.1 Subvencións para a distribución de espectáculos musicais fóra de Galicia.

Para empresas que presenten un proxecto de distribución a nivel nacional ou internacional consistente na realización dun mínimo de catro concertos en tres espazos distintos, como mínimo, e en ningún caso máis de catro concertos no mesmo espazo.

B.2. Subvencións para as representacións musicais en feiras e festivais fóra de Galicia.

Poderán acollerse a esta modalidade as empresas que presenten un proxecto de exhibición de concertos en feiras ou festivais do sector da música que se celebren fóra de Galicia

B.3. Subvencións para a asistencia a feiras e mercados musicais fóra de Galicia.

Empresas que presenten un proxecto consistente na asistencia das empresas solicitantes ás feiras e mercados que se celebren fóra da Comunidade Autónoma de Galicia para dar visibilidade aos proxectos que representan. Non se subvencionarán máis de dúas persoas por entidade solicitante e evento.

Todas as actividades para as que se solicita a subvención deberán desenvolverse entre o 1 de novembro de 2024 e o 31 de outubro de 2025.

GASTOS SUBENCIONABLES

Para as modalidades A.1/A.2/A.3 e B.1./B.2/B.3:

a) Gastos de transporte e desprazamento de todo o equipo artístico e técnico, excluíndo desprazamentos dentro da cidade. No caso de representacións en distintas cidades dentro do mesmo plan de distribución, serían xustificables os do día de desprazamento entre unha cidade e outra.

b) Gastos de aloxamento e manutención:

Modalidades A.2 e B.2: Serán subvencionables os gastos de servizos profesionais como os custos de persoal artístico e técnico necesarios para a representación. Se hai relación laboral, deberase achegar o contrato e a nómina correspondente. Se é mercantil, achegarase o contrato e factura. Os custos profesionais non poden superar o 60% do caché declarado para o espectáculo na Rede Galega de Teatros e Auditorios (RGTA).

Modalidades A.3 e B.3: Serán subvencionables os dereitos ou cotas de asistencia e inscrición en feiras ou festivais (máximo de dúas persoas por evento) e o alugueiro de espazo para promoción.

Non serán subvencionables:

1. Gastos administrativos ou de mantemento formal de empresas, como gastos de xestorías, notarías ou similares.
2. Honorarios profesionais e similares derivados da realización de representacións vinculados ao proxecto, agás os considerados artísticos ou técnicos.
3. Gastos correspondentes á elaboración de materiais de difusión vinculados ao proxecto.

A TER EN CONTA

O importe máximo que se poderá considerar como imputable ao proxecto en concepto de gastos xerais é o 25 % do custo total do proxecto.

Os gastos subvencionables deben estar realizados e pagados dentro do período do 1 de novembro de 2024 ata o 31 de outubro de 2025.

A subcontratación nunca poderá superar o 20 % do importe total da subvención outorgada

Poderán presentar solicitudes para máis dunha modalidade sen superar unha contía máxima de 15.000 euros.

Unha mesma compañía, artista ou grupo só poderá ser presentado por unha persoa solicitante.

PRAZO

O prazo de solicitudes comeza o 21 de febreiro e finaliza o 21 de agosto de 2025.

Non obstante, as axudas concederanse por orde de presentación da solicitude (coa documentación completa) ata o esgotamento de crédito.

MÁIS INFORMACIÓN

RESOLUCIÓN do 10 de xaneiro de 2025 pola que se establecen as bases reguladoras, en réxime de concorrencia non competitiva, de subvencións ás actividades de distribución para industrias culturais de artes escénicas e música, e se procede á súa convocatoria para o ano 2025 (código de procedemento CT402C).

CÓDIGO DE PROCEDEMENTO: CT402C

Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.

O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.