A través desta convocatoria establécense para o ano 2025 as axudas do Bono Remuda para evitar o peche de negocios xeradores de riqueza e emprego por falta de relevo xeneracional.
Estas axudas están destinadas a facilitar que as persoas interesadas en emprender poidan recoller o testemuño dun negocio xa viable economicamente que cesa a súa actividade por motivos como a xubilación, incapacidade ou o falecemento da persoa titular.
Aos efectos deste programa, enténdese por remuda, a transmisión do negocio da persoa ou entidade titular do meso a unha ou varias persoas, sempre que supoña a continuación da actividade, que doutra maneira pecharía, por algúns dos motivos indicados anteriormente.
Nesta convocatoria 2025 subvencionaranse as transmisións realizadas (gastos realizados e pagados) no período comprendido entre o 31 de outubro de 2024 e o 30 de setembro de 2025, salvo nos casos de que a remuda sexa mediante alugueiro de local e/ou medios produtivos.
O Bono Remuda recolle dúas liñas de actuación:
Liña 1: Bono remuda rural, para negocios situados en concellos de menos de 10.000 habitantes, dotada con 750.000 €.
Liña 2: Bono remuda xeral, para negocios situados en concellos de 10.000 ou máis habitantes, dotada con 500.000 €.
BENEFICIARIOS
Persoas traballadoras autónomas, profesionais dadas de alta no RETA ou noutros réximes especiais de seguridade social, mutualistas e sociedades (incluídas unipersoais e comunidades de bens) con domicilio fiscal en Galicia, cando se cumpran os seguintes requisitos:
- Que o negocio obxecto de remuda teña domicilio social, fiscal e centro de traballo en Galicia, cunha antigüidade mínima de 5 anos.
- Non ter transcorrido mais de 12 meses entre a publicación desta Orde e a baixa en RETA e no IAE da persoas titular e que se trate da mesma actividade e se desenvolva no mesmo local.
- Que o negocio ou actividade obxecto de remuda estea inscrito na Bolsa de remuda da Rede de Polos de Emprendemento da Xunta.
- Ser transmitido mediante contrato ou escritura pública, constando o prezo total e o obxecto de remuda.
- Que se realice o cambio de titularidade da licenza de apertura e/ou actividade ou a comunicación do inicio de actividade.
- Non estar en situación de xubilación activa no momento do traspaso.
- Ter capacidade administrativa, financeira e operativa.
- No caso de transmisión entre persoas autónomas societarias, a persoa que traspase debe posuír máis do 50 % das accións antes da publicación desta orde de axudas, e a persoa adquirente tamén debe superar ese 50 %.
Transmisores do negocio
Tamén poden ser beneficiarias as persoas autónomas que transmitan o negocio e sexan así identificadas na solicitude da que adquira a remuda, cando cumpran algún destes requisitos:
- Ter a idade de xubilación ou estar próximo (ter 62 anos ou máis).
- Estar en situación de incapacidade total, absoluta ou gran invalidez
- Ser herdeiras da persoa titular do negocio, no caso de falecemento desta.
Exclusións
Neste procedemento quedan excluídos:
- As persoas beneficiarias e que percibiran a axuda do bono remuda na pasada convocatoria (2024).
- As persoas autónomas societarias que soliciten as axudas para o mesmo negocio, tanto a título individual como a través da sociedade da que forman parte. No caso de realizar máis dunha solicitude quedarán ambas excluídas.
- Os traspasos (cesión, venta, alugueiro) de negocios realizados co cónxuxe ou parella de feito da persoa titular.
- Os traspasos (cesión, venta, alugueiro) de negocios realizados entre persoas cunha relación de parentesco ata o primeiro grao de consanguinidade, cando as persoas ascendentes manteñan a súa alta en vida laboral con actividade no mesmo negocio que se remuda.
CONTÍA
A contía de axuda para as persoas que adquiran un negocio en remuda varía segundo a liña de axuda:
- No caso da Liña 1: Bono remuda rural, a subvención será do 75 % do prezo do contrato de remuda.
- Na Liña 2: Bono remuda xeral subvenciónase o 70 % do prezo do contrato de remuda.
Increméntase nun 5% a axuda en calquera das liñas cando se dea algunha das seguintes circunstancias, acumulables entre si, e só aplicable no caso das persoas físicas que sexan:
- Mulleres.
- Menores de 30 anos.
- Teñan cumprido 52 anos.
- Desempregadas de longa duración.
- Que o negocio que se traspase teña máis de 5 traballadores.
A contía máxima subvencionable por remuda é de 30.000 € por remuda de negocio ou 10.000€ por remuda dunha licenza de actividade.
Ademais, as persoas transmisoras do negocio poderán percibir un importe de 6.000 euros cando o negocio que transmiten se encadre na Liña 1: Bono remuda rural, e de 3.000 euros cando o negocio que transmiten se encadre na Liña 2: Bono remuda xeral.
PRAZO
As solicitudes de axuda poderanse presentar desde o 24 de xaneiro ata o 30 de setembro de 2025.
INCOMPATIBILIDADES
Estas axudas serán incompatibles coas axudas convocadas para o ano 2024 no procedemento TR802R Es-Transforma, coas axudas ao emprendemento do procedemento TR880A do ano 2023 e 2024 e con outras axudas públicas que poida outorgar calquera Administración Pública para os mesmos conceptos e gastos.
A TER EN CONTA
As axudas concederanse en réxime de concorrencia non competitiva. É dicir, resolveranse por orde de solicitude, ata que se esgoten os fondos destinados.
A persoa beneficiaria estará obrigada a manter a súa alta como autónoma durante un tempo mínimo de 36 meses desde a data da escritura do contrato de remuda. Tamén deberá manter durante ese tempo a alta no IAE na mesma localidade.
A persoa beneficiaria estará obrigada a manter a mesma actividade económica durante un mínimo de 12 meses desde a data da escritura do contrato de remuda. No caso de remuda mediante alugueiro do local e/ou de medios produtivos, o prazo será de 36 meses.
A persoa beneficiaria deberá contar cun cartel informativo de tamaño mínimo A3, indicando que a actividade está sendo subvencionada pola Consellería de Emprego, durante polo menos 12 meses dende a Resolución de concesión.
Estas axudas quedan sometidas ao réxime de minimis.
MÁIS INFORMACIÓN
Acceder ao procedemento de tramitación:
CÓDIGO DE PROCEDEMENTO: TR353D
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.