O Programa Aprol-Economía Social 2025 ten por finalidade fomentar o emprendemento e o autoemprego en Galicia mediante o apoio a cooperativas e sociedades laborais. Buscan impulsar o emprego estable, especialmente en colectivos vulnerables, e incentivar a transformación de empresas en crise en entidades de economía social. Ademais, promoven o desenvolvemento sostible e a cohesión territorial.
Todo isto lévase a cabo a través de dous programas de axudas:
- Programa I: fomento do emprego en cooperativas e sociedades laborais (procedemento TR802G).
- Programa II: fomento do acceso á condición de persoa socia (procedemento TR802J).
PROGRAMA I: FOMENTO DO EMPREGO EN COOPERATIVAS E SOCIEDADES LABORAIS
BENEFICIARIOS
Poderán ser beneficiarias deste programa as cooperativas e sociedades laborais que incorporen como persoas socias traballadoras ou de traballo con carácter indefinido, en centros sitos en Galicia, as seguintes persoas:
- Persoas desempregadas e inscritas como demandantes de emprego no momento da incorporación.
- Persoas vinculadas á corporativa ou sociedade laboral por un contrato de traballo fixo discontinuo
- Persoas que sexan socias da cooperativa á que se incorporan, sempre que estiveran desempregadas e inscritas como demandantes de emprego no momento da incorporación.
- Persoas asalariadas dunha empresa que se transforme nunha cooperativa ou sociedade laboral, sempre que non teñan a condición de socias da empresa formada.
A incorporación deberá supoñer incremento do emprego fixo e do número de persoas socias traballadoras ou de traballo indefinidas, respecto á media dos últimos doce meses anteriores á incorporación dos novos socios e socias por quen se percibe a subvención.
Tamén poderán acollerse a estes incentivos as cooperativas e sociedades laborais que contraten, en centros situados en Galicia, como persoas socias traballadoras ou de traballo a proba, persoas menores de 30 anos (ou menores de 35 se é unha persoa con discapacidade) que no momento da incorporación estean desempregadas e inscritas como demandantes de emprego.
A contratación pode ser a xornada completa ou a tempo parcial, tendo que comprender como mínimo o 50% da xornada ordinaria no caso de contratacións a tempo parcial.
Exclusións
Non poderá concederse esta subvención cando:
- Se trate da incorporación de persoas socias traballadoras ou de traballo que tiveron tal condición na mesma cooperativa ou sociedade laboral nos dous anos anteriores á contratación.
- Se trate da incorporación de persoas polas cales se obtiveron as subvencións previstas para a contratación como socias, nos último 5 anos.
- As cooperativas e as sociedades laborais teñan o mesmo domicilio social ou fiscal que outras cooperativas e sociedades laborais xa inscritas nos correspondentes rexistros.
- A cooperativa ou sociedade laboral se crea no período de execución desta orde cuxos socios coincidan en máis dun 50% cos socios doutra cooperativa ou sociedade laboral preexistente.
CONTÍA
Por cada persoa que se incorpore con carácter indefinido e a xornada completa, a subvención ascenderáa 6.000€ con carácter xeral.
Esta contía incrementarase nas seguintes porcentaxes, acumulables entre si:
- Un 25% se a persoa incorporada é unha muller.
- Un 25% se a persoa incorporada ten discapacidade ou se atopa en situación ou risco de exclusión social.
- Un 25 % se a persoa incorporada ten unha discapacidade con especiais dificultades para a súa inserción laboral.
- Un 25 % se a persoa incorporada ten máis de 45 anos.
- Un 25 % se a persoa incorporada ten a condición de emigrante retornada.
- Un 25 % se a persoa ten a condición de trans.
- Un 25 % no caso de que o centro de traballo a que se incorpora a persoa socia estea situado nun concello rural.
- Un 25 % se se trata dunha cooperativa xuvenil.
- Un 25% se se trata de unha entidade de nova creación constituída inicialmente con catro ou máis persoas socias traballadoras.
Por cada mozo ou moza incorporada como persoa socia traballadora ou de trabllo a proba a subvención ascenderá 600€ ao mes, por un período de entre 6 e 12 meses.
Cando a dedicación sexa a tempo parcial ou en condición de fixo discontinuo, a contía dos incentivos previstos nos apartados anteriores reducirase ao 50%
A contía máxima que poderá ser concedida a unha entidade beneficiaria por este programa será de 67.500€
PROGRAMA II: FOMENTO DO ACCESO Á CONDICIÓN DA PERSOA SOCIA
BENEFICIARIOS
Poderán optar a beneficiarias deste programa as persoas que accedan á condición de persoa socia traballadora ou de traballo dunha cooperativa ou sociedade laboral con carácter indefinido, que desenvolvan a súa actividade nun centro sito en Galicia e que, no momento da incorporación, cumpran algunha das seguintes condicións:
- Ser persoas desempregadas inscritas como demandantes de emprego.
- Ser persoas socias a proba da cooperativa á cal se incorporan.
- Ser persoas asalariadas da cooperativa ou sociedade laboral á cal se incorporan.
- Ser persoas socias traballadoras ou de traballo dunha cooperativa ou sociedade laboral a tempo parcial que accedan á mesma condición a tempo completo.
Tamén poderán ser beneficiarias as persoas que, sendo desempregadas e inscritas como demandantes de emprego, comecen como autónomos e se incorporen nunha cooperativa como persoas socias con carácter indefinido, con compromiso de exclusividade, para comercializaren os seus produtos, obter subministracións, servizos e a asistencia técnica que precisen, sempre que teñan o domicilio social e fiscal en Galicia.
No caso de socios e socias traballadoras ou de traballo, a incorporación poderá ser a xornada completa ou a tempo parcial, en cuxo caso o tempo de traballo deberá comprender como mínimo o 50% da xornada ordinaria.
CONTÍA
A contía será de ata 6.000€ nos seguintes casos:
- Persoas desempregadas inscritas como demandantes de emprego.
- Persoas socias a proba da cooperativa á cal se incorporan.
- Persoas asalariadas da cooperativa ou sociedade laboral á cal se incorporan.
- Persoas asalariadas dunha empresa que se transforme nunha cooperativa ou sociedade laboral, sempre que non teñas a condición de socias da empresa transformada.
- Persoas que, sendo desempregadas e inscritas como demandantes de emprego, emprendan unha actividade por conta propia e se incorporen nunha cooperativa como persoas socias con carácter indefinido, con compromiso de exclusividade, sempre que teñan o seu domicilio social e fiscal en Galicia.
No caso de persoas socias traballadoras ou de traballo dunha cooperativa ou sociedade laboral a tempo parcial que accedan á mesmo condición a tempo completo, a contía será de ata 3.000€.
As contías sinaladas previamente poderán incrementarse nas seguintes porcentaxes, de forma acumulable entre sí:
- Un 25% se a persoa incorporada é unha muller.
- Un 25% se a persoa incorporada ten discapacidade ou se atopa en situación ou risco de exclusión social.
- Un 25 % se a persoa incorporada ten unha discapacidade con especiais dificultades para a súa inserción laboral.
- Un 25 % se a persoa incorporada ten máis de 45 anos.
- Un 25 % se a persoa incorporada ten a condición de emigrante retornada.
- Un 25 % se a persoa ten a condición de trans.
- Un 25 % no caso de que o centro de traballo a que se incorpora a persoa socia estea situado nun concello rural.
- Un 25 % se se trata dunha cooperativa xuvenil.
- Un 25% se se trata de unha entidade de nova creación constituída inicialmente con catro ou máis persoas socias traballadoras.
Cando a dedicación sexa a tempo parcial ou en condición de fixo descontinuo a contía dos incentivos reducirase ao 50%.
PRAZO
O prazo de solicitudes comezará o 17 de xaneiro de 2025 e finalizará o 16 de setembro de 2025.
INFORMACIÓN ADICIONAL
No caso da concesión das axudas do Programa I:
- As entidades beneficiarias deberán manter, polo menos durante un período de tres anos desde a data de resolución de concesión, a condición de cooperativa ou sociedade laboral.
- As entidades beneficiarias deberán manter o incremento de emprego fixo e o número de persoas socias traballadoras ou de traballo indefinidas.
No caso da concesión das axudas do Programa II:
- As persoas beneficiarias deberán manter a condición na mesma entidade na que se incorporan por un período mínimo de dous anos.
- O importe das subvencións recoñecido como capital social deberá manter este carácter por un período mínimo de 2 anos.
MÁIS INFORMACIÓN
Acceder ao procedemento de tramitación:
CÓDIGO DE PROCEDEMENTO DO PROGRAMA I: TR802G
CÓDIGO DE PROCEDEMENTO DO PROGRAMA I: TR802J
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación é só para fins informativos; en ningunha circunstancia o contido desta publicación poderá substituir a información proporcionada nos documentos oficiais.