Esta axuda está pensada para apoiar ás pequenas empresas que desenvolvan actividades non agrícolas en zonas rurais de Galicia, financiando parcialmente a adquisición de maquinaria e equipamento co fin de mellorar, modernizar ou ampliar o seu negocio. O obxectivo principal é fomentar a economía no rural e darlle un pulo ás empresas que operan fóra do sector agrícola.
BENEFICIARIO
Pequenas empresas e persoas autónomas que se dediquen a actividades non agrícolas situadas en zonas rurais de Galicia e que estean constituídas ou dadas de alta con anterioridade ao 1 de setembro de 2024.
Para ser considerada “pequena empresa” debe ter menos de 50 traballadores e unha facturación inferior a 10 millóns de euros.
No caso das pequenas empresas rurais, estas deberán ter a súa sede social ou un centro de traballo nunha zona rural de Galicia. No caso das persoas autónomas, deberán residir nunha zona rural de Galicia.
Exclusións. Non poderán ser beneficiarias destas axudas:
- Empresas situadas en zonas densamente poboadas (ver listado ZDP).
- Agrupacións de persoas xurídicas, as comunidades de bens ou calquera outro tipo de unidade que careza de personalidade xurídica propia.
- Persoas xurídicas sen ánimo de lucro.
- Empresas de produción primaria agrícola ou pesqueira.
- Empresas que teñan débedas coa administración pública.
ACTIVIDADES SUBVENCIONABLES
- Maquinaria e equipos para a produción de bens e materiais.
- Equipamento para prestación de servizos en sectores como enxeñaría, arquitectura, limpeza industrial ou veterinaria.
- Material necesario para a transformación ou comercialización de produtos agrarios (con límite de 100.000 € de orzamento).
- Equipamento para servizos sociais como garderías ou coidado de persoas maiores.
- Ferramentas e maquinaria para actividades de lecer, artesanía e comercio polo miúdo.
Gastos non subvencionables. Entre outros, non se subvencionarán:
- Gastos de funcionamento como material funxible, embalaxes ou mobiliario de oficina.
- Vehículos de transporte e maquinaria agrícola ou forestal.
- Software xeral, páxinas web e equipos informáticos de oficina.
- Instalacións de calefacción, climatización ou enerxías renovables.
- Alugueiro de equipamentos ou investimentos financiados mediante leasing.
- Gastos administrativos, impostos (como o IVE) ou taxas por licenzas.
CONTÍA DAS AXUDAS
A axuda cobre o 45 % do investimento subvencionable, tendo en conta os seguintes límites:
- Investimento mínimo: 20.000 € (5.000 € no caso de proxectos de artesanía).
- Investimento máximo: 250.000 € (100.000 € para proxectos de artesanía).
PRAZO
O prazo para a presentación de solicitudes comeza o 30 de xaneiro de 2025 e remata o 28 de febreiro de 2025.
A TER EN CONTA
Para poder ser subvencionables, os proxectos non poden estar iniciados na data de presentación da solicitude da axuda. Para estes efectos, considerarase como inicio do investimento o comezo dos traballos de construción ou ben o primeiro compromiso en firme para o pedido dos equipamentos ou outro compromiso que faga o investimento irreversible e que vincule xuridicamente o solicitante, se esta data é anterior.
Existe a obriga de manter os investimentos destinados ao fin para o que se concedeu á subvención durante un mínimo de 5 anos desde a resolución de pagamento final.
O prazo límite para executar e xustificar os investimentos correspondentes á anualidade 2025 será o 15 de outubro de 2025, sen que sexa posible a súa ampliación.
As axudas concederanse en réxime de concorrencia competitiva, aplicando os criterios fixados no ARTIGO 18 das bases.
Estas axudas están sometidas ao réxime de minimis.
MÁIS INFORMACIÓN
CÓDIGO DE PROCEDEMENTO: MR708A
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír á información proporcionada nos documentos oficiais.