Esta convocatoria da Xunta de Galicia ten por obxecto promover o autoemprego e a actividade emprendedora en Galicia por parte das persoas emigrantes galegas retornadas. Estas subvencións están dirixidas a aquelas persoas que se establezan como traballadoras autónomas ou por conta propia, facilitando a súa integración na sociedade galega, e axudándoas a sufragar os gastos derivados do seu establecemento.
BENEFICIARIOS
Poderán ser beneficiarias as persoas que, residindo fóra de España, se establezan en Galicia e cumpran algún dos seguintes requisitos:
- Ser persoas galegas e nacidas en Galicia.
- Ser cónxuxe ou persoa con unión análoga conxugal ou descendente por consanguinidade de persoa galega e nacida en Galicia.
Requisitos adicionais
Ademais deberán cumprir cos seguintes requisitos na data de presentación da solicitude:
- Estar en posesión da nacionalidade española antes do retorno a España.
- Ter residido no estranxeiro e que a data do retorno a España sexa a partir do 1 de xaneiro de 2023, incluído.
- Darse de alta no RETA ou en calquera outro réxime especial por conta propia da Seguridade Social ou en mutualidade do colexio profesional con anterioridade á presentación da solicitude.
- Residir nun concello da Comunidade Autónoma de Galicia.
- Ter o domicilio fiscal en Galicia.
- Exercer a actividade empresarial ou profesional en Galicia.
- Non ter sido beneficiaria desta axuda en anteriores convocatorias.
- Non incorrer en ningunha das circunstancias e prohibicións para obter a condición de persoa beneficiaria de subvencións enumeradas no artigo 10 da Lei 9/2007.
Exclusións
Quedan excluídos destas axudas os autónomos colaboradores.
CONTÍA
A contía da subvención será de 6.000€.
O importe anterior poderá ter os seguintes incrementos, que serán acumulables:
- Se a persoa solicitante é muller: 1.000€.
- Se o centro de traballo está situado nun concello rural: 3.000€.
PRAZO
O prazo de presentación de solicitudes estará aberto desde o 7 de febreiro ata o 30 de setembro de 2025.
COMPATIBILIDADE
A obtención desta subvención é compatible con outras que outorguen as administracións públicas polos mesmos conceptos.
A TER EN CONTA
Coa solicitude deberá presentarse, entre outra documentación, un plan de negocio empresarial, segundo o modelo anexo II que aparece nas bases. Este plan deberá estar informado por unha entidade independente (entre os que están os Axentes de Emprego e desenvolvemento local e a Rede de polos de emprendemento).
A persoa beneficiaria estará obrigada a manter a actividade para a que se solicita a axuda (permanecer de alta no RETA ou na mutualidade de colexio profesional) durante un tempo mínimo de 18 meses desde a súa alta como persoa traballadora autónoma.
Estas axudas están sometidas ao réxime de minimis.
MÁIS INFORMACIÓN
CÓDIGO DE PROCEDEMENTO:PR937A
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.