A finalidade desta convocatoria é financiar accións formativas dirixidas a persoas desempregadas, co compromiso de contratación dunha porcentaxe mínima do alumnado que complete con éxito a formación.
Esta iniciativa busca mellorar a cualificación profesional das persoas desempregadas, responder ás necesidades de contratación das empresas mediante a formación en competencias específicas e incrementar a empregabilidade das persoas e a competitividade do tecido empresarial galego.
BENEFICIARIOS
- Empresas, calquera que sexa a súa forma xurídica.
- Agrupacións temporais de empresas, que deberán formalizar un convenio que recolla compromisos de execución de cada membro.
- Asociacións empresariais sen ánimo de lucro.
Requisitos
- Compromiso de contratar un mínimo do 60% do alumnado formado en cada acción formativa cun contrato de 6 meses ou do 40% cun contrato de 12 meses ou máis.
- A contratación comprometida deberá realizarse no prazo de 2 meses desde a finalización da formación.
- As empresas beneficiarias deben contar con medios propios ou externos (acordo cunha entidade de formación) en Galicia para impartir a formación, e dispor das instalacións e equipamentos necesarios.
Exclusións
- Administracións públicas, sociedades públicas e entidades vinculadas a elas.
- Empresas que reducisen o seu persoal fixo nun 15% ou máis nos 6 meses anteriores á solicitude, salvo casos de despedimentos xustificados.
- Entidades que cometan ou inciten prácticas discriminatorias
- Entidades incursas nalgunha das circunstancias de exclusión previstas na Lei de Subvencións de Galicia.
ACTIVIDADES SUBVENCIONABLES
- Accións formativas que garden relación coa actividade empresarial da entidade solicitante e que formen parte do Catálogo de Especialidades Formativas do Servizo Público de Emprego Estatal.
- No caso de que a especialidade formativa solicitada non exista no catálogo, pódese presentar unha proposta xustificada para a súa inclusión.
Condicións
- Contratación mínima do 60% do alumnado formado cun contrato de 6 meses ou contratación mínima do 40% cun contrato de 12 meses ou máis. Non se admite a combinación de ambos tipos de contratos na mesma acción formativa.
- O alumnado serán persoas desempregadas inscritas como demandantes de emprego, sen ocupación.
- O número máximo de participantes na acción formativa será de 15.
- A modalidade da formación debe ser presencial.
- Duración máxima subvencionable da acción formativa: 300 horas.
Non serán subvencionables
- Actividades de formación reguladas pola Lei 3/2022 de Formación Profesional.
- Accións formativas non aprobadas previamente e incluídas no catálogo de Especialidades Formativas do Servizo Público de Emprego Estatal.
CONTÍA DAS AXUDAS
A contía da subvención calcúlase por acción formativa, en función do número de participantes previstos, do numero de horas e dos módulos económicos que varían segundo a especialidade formativa e os custos directos e indirectos asociados reflectidos no anexo III da orde de convocatoria.
Adicionalmente: Establécese un custo unitario de 16 €/hora lectiva para cubrir adaptacións necesarias para alumnado con discapacidade.
PRAZO
O prazo para presentar solicitudes estará aberto ata o 30 de setembro de 2025, ou ata que se esgote o crédito dispoñible.
MÁIS INFORMACIÓN
Código de procedemento: TR301P
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.