A Xunta de Galicia convoca estas axudas co fin de favorecer as baixas taxas de ocupación feminina en ocupacións masculinizadas, para o que se establecen dúas liñas:
1. Liña de incentivos á contratación por conta allea de mulleres desempregadas.
2. Liña de axudas para a adaptación dos espazos ou dos postos de traballo na empresa, de carácter opcional, coa finalidade de eliminar barreiras e/ou obstáculos que impidan ou dificulten o acceso e o desempeño profesional das mulleres en ocupacións masculinizadas.
QUEN PODE SOLICITAR
- Perosas empregadoras e empresas, calquera que sexa a forma xurídica que adopten, incluídas as persoas autónomas, as sociedades civís e as comunidades de bens, aínda que carezan de personalidade xurídica, que contraten mulleres en ocupacións masculinizadas para prestaren servizos en centros de traballo de Galicia.
As persoas que teñan 50 ou máis persoas traballadoras deberán cumprir a cota de reserva para persoas con discapacidade de polo menos, un 2 %.
PERSOAS DESTINATARIAS FINAIS
- As mulleres que sexan contratadas en ocupacións masculinizadas e que cumpran o requisito de estar desempregadas e inscritas como demandantes de emprego no Servizo Público de Emprego de Galicia.
Non se requirirá a inscrición no Servizo Público de Emprego de Galicia no caso de mulleres que se atopen nalgún dos casos de medidas urxentes en materia de incentivos á contratación laboral e mellora da protección social das persoas artistas.
GASTOS SUBVENCIONABLES
As contratacións por conta allea de mulleres en ocupación masculinizadas ou con infrarepresentación feminina na contratación:
- Os contratos subvencionables deberán ser de duración indefinida, ben con xornada a tempo completo, ben a tempo parcial. No caso de contratación a tempo parcial, a xornada será como mínimo do 50 %. Inclúese os contratos de traballo indefinidos para a prestación de servizos fixos descontinuos, que deberán ser a tempo completo e cunha duración mínima de 6 meses.
- O período durante o que se teñen que producir os contratos para que sexan subvencionables será desde o 1 de xaneiro de 2024 ata o 20 de outubro de 2024.
- No caso de novas contratacións, o período máximo para realizalas rematará aos vinte días hábiles da recepción da notificación de concesión da axuda, e en todo caso o 20 de outubro de 2024.
- O número máximo de contratos que se van a subvencionar por persoa ou entidade beneficiaria establécese en 7.
Serán subvencionables os gastos derivados de obras de adaptación dos espazos ou dos postos de traballo na empresa, coa finalidade de eliminar barreiras ou obstáculos que impidan ou dificulten o acceso e o desempeño profesional das mulleres na empresa.
- O período durante o que se teñen que producir obras de adaptación dos espazos ou dos postos de traballo subvencionables será desde o 1 de xaneiro de 2024 ata o 20 de outubro de 2024.
CONTÍA DAS AXUDAS
- Incentivos á contratación
As contratacións indefinidas iniciais a tempo completo de mulleres desempregadas incentivaranse cunha contía base de 15.000 €. No caso de redución de xornada a contía reducirase na mesma proporción.
As contratacións indefinidas iniciais a tempo parcial (mínimo 50 %) e as contratacións indefinidas fixas-discontinuas (mínima 6 meses) incentivaranse cunha contía base de 7.500 €.
As contías indicadas anteriormente incrementaranse nun 15 % nos seguintes casos, que son acumulables entre si:
- No suposto de que o centro de traballo estea situado nunconcello rural.
- Se a muller contratada é unha persoa con discapacidade.
- Se a muller contratada é maior de 45 anos.
- Se a muller contratada é emigrante retornada ou estranxeira.
- Se a muller contratada é persoa trans.
A contía máxima posible que se vai subvencionar por persoa contratada con carácter indefinido é de 26.250 €.
As contratacións deberán estar comunicadas a través da aplicación Contrat@ no prazo de 10 días hábiles desde o seu inicio.
2. Gastos derivados de obras de adaptación dos espazos ou dos postos de traballo
Importe máximo da axuda: 10.000 €.
Os gastos de obras de adaptación dos espazos ou dos postos de traballo deberán estar realizados e pagados a data 20 de outubro de 2024.
EXCLUSIÓNS
Non serán subvencionables:
- As relacións laborais de carácter especial previstas no artigo 2.1 do Real decreto lexislativo 2/2015, do 23 de outubro, polo que se aproba o texto refundido da Lei do Estatuto dos traballadores ou noutras disposicións legais, así como as contratacións de persoas traballadoras para prestaren servizos noutras empresas mediante contratos de posta á disposición.
- Os contratos realizados co cónxuxe, os ascendentes, os descendentes e demais parentes, por consanguinidade ou afinidade, ata o segundo grao inclusive, da empresaria ou do empresario ou das persoas que teñan cargos de dirección ou sexan membros dos órganos de administración das empresas que revistan a forma xurídica de sociedade, así como as que se produzan con estes últimos.
- Os contratos de traballo realizados coas persoas socias ou administradoras da entidade solicitante da axuda.
- Os contratos de traballo que se realicen con mulleres que nos 6 meses anteriores á data da contratación prestasen servizos na mesma empresa ou grupo de empresas mediante un contrato de carácter indefinido, ou nos últimos 3 meses mediante un contrato de carácter temporal.
INCOMPATIBILIDADES
As subvencións previstas neste programa serán incompatibles con outras subvencións ou axudas públicas, con independencia do seu importe, para o mesmo obxecto e finalidade das distintas administracións públicas competentes ou das súas entidades vinculadas ou dependentes.
Estas axudas están en réxime de minimis.
PRAZO
Dende o 19 de xullo ata o 30 de setembro de 2024.
MÁIS INFORMACIÓN
Código de procedemento de tramitación: TR349W
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
Este resumo ten unicamente fins informativos; en ningunha circunstancia o contido desta publicación poderá substituír á información proporcionada nos documentos oficiais.