Esta convocatoria de axudas para mellorar a preparación dixital fronte a ameazas cibernéticas nas empresas galegas (Programa Empresa Cibersegura) ten como finalidade apoiar a adopción de solucións, servizos e actuacións que incrementen a capacidade de prevención, detección e resposta fronte a incidentes de seguridade dixital no ámbito empresarial, contribuíndo así á transformación dixital segura do tecido produtivo de Galicia.
Beneficiarios
Empresarios individuais (autónomos) e persoas xurídicas que teñan a condición de empresa, con independencia do seu tamaño, que teñan domicilio social ou un centro de traballo en Galicia no que se desenvolva a actividade. Ademais, deberán atoparse validamente constituídas no momento da solicitude.
Non poderán ter a condición de persoas beneficiarias as empresas que presten servizos de ciberseguridade de natureza análoga ao obxecto da axuda e que puidesen actuar como provedores.
Conceptos subvencionables
Poderán subvencionarse os gastos derivados do acceso a servizos especializados de ciberseguridade prestados por entidades provedoras homologadas, segundo as categorías e conceptos a subvencionar:
- Diagnóstico de madurez e análise de riscos.
- Auditorías técnicas para avaliar a madurez dixital e riscos de ciberseguridade.
- Informe técnico con recomendacións e propostas de mellora.
- Prestación de itinerarios técnicos en modelo de servizo.
- Cloudificación IaaS.
- Securización ITaaS.
- Securización OTaaS.
- Actuacións complementarias de prestación única.
- Hacking ético.
- Concienciación e cultura en ciberseguridade.
- Gobernanza e políticas de ciberseguridade.
- CISO as a Service (CISOaaS).
Non serán subvencionables os gastos de mantemento ordinario das infraestruturas existentes nin os investimentos en hardware ou adquisición de equipamentos físicos.
Será o Igape o que seleccione os provedores que poden prestar este tipo de servizos. A relación de provedores homologados estará dispoñible na sede electrónica do Igape (https://www.igape.gal/gl/entidades-homologadas-ciber), e poderá ser actualizada en función das altas e das baixas no catálogo.
Só se admitirán aquelas solicitudes que presenten un gasto subvencionable igual ou superior a 18.000 € (investimento mínimo).
Contía
Concederase unha axuda do 75 %, ata un máximo de 30.000 € (investimento máximo subvencionable: 40.000 euros).
Non se subvencionarán actuacións que non acaden un investimento mínimo de 18.000 €.
Prazo
O prazo para a presentación de solicitudes comeza o 25 de agosto e finaliza o 15 de novembro de 2025.
Máis información
Acceder ao procedemento de tramitación:
- Código de procedemento IG408O
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
Esta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.