QUE É A ECONOMÍA SOCIAL?
A Economía Social agrupa a conxunto de entidades (cooperativas, sociedades laborais, asociacións, fundacións, centros especiais de emprego, empresas de inserción…) que realizan actividades económicas pero con fins sociais, non lucrativos ou de beneficio colectivo. A súa prioridade non é a maximización do beneficio económico, senón a xeración de valor para os seus membros, os traballadores e a comunidade.
Estas entidades comparten principios como:
- Primacía das persoas sobre o capital.
- Participación democrática na toma de decisións.
- Compromiso coa sustentabilidade e o desenvolvemento do territorio.
- Reinvestimento dos excedentes para fins sociais ou colectivos.
ECONOMÍA SOCIAL VS. ECONOMÍA MERCANTIL: DIFERENZAS
| Característica | Economía Social | Economía Mercantil |
| Obxectivo principal | Valor social, ben común | Lucro e beneficio económico |
| Propiedade | Colectiva ou dos traballadores | Individual ou de investidores |
| Xestión | Participativa e democrática | Xerarquizada e capitalista |
| Reparto de beneficios | Reinvestimento ou distribución equitativa | Dividendos para socios ou accionistas |
| Impacto social | Prioriza o desenvolvemento local e sostible | Prioriza o crecemento económico e financeiro |
QUEN FORMA PARTE DA ECONOMÍA SOCIAL?
A economía social está formada por organizacións que poñen ás persoas por riba do lucro.Inclúe cooperativas, sociedades anónimas laborais, sociedades limitadas laborais, mutuas. Tamén se coñece como parte do terceiro sector, xa que non pertence nin ao ámbito público nin ao privado tradicional, senón que combina actividade económica con fins sociais.
As cooperativas son unha fórmula xurídica e empresarial baseada na asociación voluntaria de persoas que se unen para satisfacer necesidades económicas, sociais e culturais comúns a través dunha empresa de propiedade conxunta e democraticamente controlada. Son unha opción moi valorada nos ámbitos rural, social e de servizos, e promoven principios de solidariedade, igualdade e autoxestión
As mutuas, fundacións e asociacións son entidades sen ánimo de lucro que teñen finalidades sociais, culturais ou asistenciais, aínda que difiren na súa estrutura e funcionamento.
SOCIEDADES LABORAIS
As Sociedades Laborais son un tipo específico de sociedade mercantil dentro da economía social, normalmente anónimas (S.A.L.) ou limitadas (S.L.L.), nas que a maioría do capital social pertence aos propios traballadores da empresa.
Características principais:
| Nº de socios | Responsabilidade | Capital | Particularidades |
| Mínimo 3 (con excepcións) | Limitada ao capital achegado | Segundo tipo de sociedade (mínimo 1 € para S.L.L.) | Polo menos o 51 % do capital debe estar en mans dos traballadores |
A REDE EUSUMO
Eusumo é unha rede de colaboración promovida pola Xunta de Galicia para fomentar e apoiar a economía social na comunidade autónoma. A través dos seus centros ofrece:
- Información e asesoramento especializado.
- Formación en cooperativismo e outras fórmulas de economía social.
- Apoio na creación de novas empresas e na consolidación de proxectos existentes.
- Recursos e materiais para a promoción da cultura emprendedora social.
A Rede Eusumo está dirixida a emprendedores, persoas desempregadas, cooperativas, sociedades laborais e outras entidades do terceiro sector.
A economía social representa unha forma máis humana e sostible de facer empresa. Combina actividade económica con compromiso social, xerando riqueza pero tamén cohesión, participación e desenvolvemento nos territorios. Un modelo que, con ferramentas como as sociedades laborais ou o apoio da Rede Eusumo, gaña cada vez máis protagonismo no presente e futuro do emprego.