VII EDICIÓN DE VIAGALICIA - Emprende na rede

Impulsar proxectos empresariais innovadores é o obxectivo que busca a aceleradora ViaGalicia, un programa promovido pola Zona Franca de Vigo e a Xunta de Galicia que vai xa pola súa sétima edición e que nas edicións anteriores apoiou un total de 78 proxectos de emprendemento.

Baixo a supervisión dun equipo de expertos, combina formación, tutorización, asesoramento especializado, mentoring, espazo de traballo e financiamento para validar as propostas de negocio e axudar ao despegue, crecemento e consolidación das iniciativas empresariais.

Para esta edición seleccionaranse un total e 40 proxectos (20 na sede de Lugo e 20 na sede de Vigo) para a fase primeira fase, de formación ou pre-aceleración.

Beneficiarios

Emprendedores e empresas de calquera sector produtivo que teñan unha proxecto innovador, invertible, acelerable e relevante en calquera das súas fases.

Os requisitos que deben cumprir para acceder ao programa son os seguintes:

O equipo promotor da iniciativa emprendedora deberá estar formado por un mínimo dúas persoas.
Todos os membros do equipo deberán ser maiores de idade.
Cada participante poderá participar en cantas candidaturas estime oportuno, coa limitación de que só optará á elixibilidade dunha única candidatura.
Tratándose dunha empresa constituída, ter unha antigüidade máxima de 5 anos (7 anos, no caso de empresas de biotecnoloxía, enerxía, industriais e outros sectores estratéxicos ou que desenvolvesen tecnoloxía propia).
As persoas promotoras deberán ser autores intelectuais das ideas que presentan ou dispoñer dos permisos correspondentes.

Fase de pre-aceleración

Os 40 proxectos pre-seleccionados entrarán no “Programa de Capacitación ou pre-aceleración” da Academia, que se desenvolverá nun máximo de 7 fins de semana (en xornada de venres pla tarde e sábados de mañá). Este programa inclúe sesións de formación e networking, traballo individualizado cos titores e sesións de presentación do proxecto.

Para pasar á fase de aceleración será necesario que asistan polo menos 2 membros do equipo ao 80% das sesións.

Fase de aceleración e apoios económicos

Os proxectos que superen a a fase de pre-aceleración na Academia presentarán o seu proxecto ante o Comité Técnico e as Entidades colaboradoras nunha xornada de presentación ou “Demo Day”, da que se seleccionarán un máximo de 15 proxectos aos que se lle fará unha invitación formal para incorporase á Aceleradora do Centro de Negocios de Porto do Molle (Nigrán) e participar nun Programa de Alto Rendemento de 9 meses de duración.

Os proxectos aprobados que se incorporen á Aceleradora, tamén terán:

Unha subvención a fondo perdido de ata 25.000 euros para o financiamento dos gastos do arranque da empresa.
A posibilidade de financiamento a través de Vigo Activo ou a través de XesGalicia, no caso de que se considere “proxecto con alto potencial de crecemento e escalabilidade».