A finalidade desta convocatoria de axudas é promover a creación de novos empregos estables e contribuír ao crecemento e consolidación de pequenas empresas postas en marcha polas persoas autónomas.
Para elo, establécense dúas liñas de axuda, que son compatibles entre si:
1. Bono de contratación: subvención para a contratación indefinida inicial de persoas desempregadas realizadas por persoas traballadoras autónomas ou profesionais con domicilio social e fiscal en Galicia.
2. Bono de formación (opcional), consistente nunha subvención ás persoas traballadoras autónomas ou profesionais con domicilio en Galicia, para que leven a cabo accións formativas dirixidas ás persoas traballadoras cuxos contratos se subvencionan a través do bono de contratación anterior, co obxecto de mellorar os seus coñecementos e as habilidades relacionadas co posto de traballo.
BENEFICIARIOS
Poderán ser beneficiarias as persoas traballadoras autónomas ou profesionais con domicilio social e fiscal en Galicia, pola primeira, segunda e terceira contratación que realicen con carácter indefinido.
Exclusións
Non poderán ser beneficiarias:
- As persoas que levaron a cabo a mesma actividade nos tres meses inmediatamente anteriores á data de inicio da nova situación de alta na Seguridade Social.
- As sociedades civís ou comunidades de bens, así como as persoas que as integran
- As persoas autónomas colaboradoras.
ACTIVIDADES SUBVENCIONABLES Y REQUISITOS
1. Bonos de contratación
Serás subvencionables as contratacións que cumpran os seguintes requisitos:
- As persoas contratadas deben ser desempregadas.
- Deben realizarse dentro do período subvencionable, que comprende desde o 1 de outubro de 2024 ata o 30 de setembro de 2025.
- As contratacións deben ter lugar con anterioridade á solicitude de axudas.
- A contratación deberá ser indefinida inicial, incluídos os contratos fixos-discontinuos, en cuxo caso o período de actividade deberá ter unha duración mínima de 6 meses cada ano.
O contrato poderá ser a tempo completo ou a tempo parcial (neste caso, cunha xornada mínima do 50%).
Será subvencionable a primeira contratación indefinida inicial cando na data en que se formalice o contrato polo que se solicita a subvención non haxa outra persoa traballadora contratada cunha relación laboral indefinida.
Serán subvencionables a segunda e a terceira contratación indefinida inicial, sempre que con anterioridade á formalización deses contratos existan no cadro de persoal da empresa, unha (para a 2ª contratación) ou dúas (para a 3ª) persoas contratadas indefinidas.
IMPORTANTE: A persoa beneficiaria deberá manter no seu cadro de persoas a persoa contratada por un tempo mínimo de trinta e seis meses.
2. Bonos de formación
As persoas beneficiarias dos bonos de contratación poderán solicitar os bonos para a formación das persoas traballadoras cuxos contratos se subvencionen. Para iso, teñen que darse os seguintes requisitos:
- A persoa que reciba a formación debe ser a mesma cuxo contrato se subvenciona.
- A duración da acción formativa será dun mínimo de 70 horas de formación teórica.
- Esta formación terá lugar dentro dos tres primeiros meses desde a data de inicio do contrato, e deberá estar finalizada o 30 de outubro de 2025.
CONTÍA
1. Bonos de contratación
As contratacións indefinidas iniciais terán os seguintes incentivos:
- Pola primeira persoa traballadora indefinida desempregada: 7.500€. A contía será de 9.000€ cando a persoa desempregada forme parte dalgún dos seguintes colectivos:
- Muller.
- Persoas desempregadas de longa duración.
- Maiores de 52.
- Persoas con discapacidade.
- Persoas en situación ou risco de exclusión social.
- Persoas emigrantes retornadas.
- Persoas estranxeiras.
- Pola segunda e terceira persoa traballadora indefinida: 9.000€. A contía será de 11.000€ cando a persoa desempregada se encadre nalgún dos colectivos mencionados previamente.
Os incentivos mencionados incrementaranse nun 15%, de forma acumulable entre si:
- No caso de que o centro de traballo estea situado nun concello rural.
- Persoas maiores de 45 anos (non se aplica se xa se aplica por maiores de 52 anos).
- Persoas trans.
- Contratación de mulleres en profesións nas que a muller estea subrepresentada.
2. Bonos de formación
A axuda deste bono será de 2.000€ por cada persoa traballadora cuxo contrato se subvenciona por medio do bono de contratación.
PRAZO
O prazo para a presentación de solicitudes comezará o 24 de xaneiro e rematará o 30 de setembro de 2025.
INCOMPATIBILIDADES
Estas axudas serán incompatibles con outras que outorguen as administracións públicas como medida de fomento de emprego polas mesmas persoas traballadoras cuxos contratos se subvencionan.
Tamén serán incompatibles en materia formativa coa percepción de outras axudas, subvencións, ingresos ou recursos para o financiamento das horas de formación por parte de calquera Administración ou ente público ou privado, estatal, da Unión Europea ou de organismos internacionais.
A TER EN CONTA
As axudas concederanse por orde de presentación de solicitudes (considerando a data na que estea presentada a documentación completa requirida nas bases) ata o esgotamento do crédito.
Os beneficiarios terán a obriga de manter á persoa traballadora obxecto de subvención durante un período mínimo de TRINTA E SEIS meses.
Estas axudas están sometidas ao réxime de minimis.
MÁIS INFORMACIÓN
CÓDIGO DE PROCEDEMENTO: TR349F
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.