Obxecto
Esta orde ten por obxecto establecer as bases reguladoras xerais e a convocatoria para o ano 2026 para a concesión, en réxime de concorrencia competitiva, de axudas a proxectos colectivos, cofinanciados polo FEMPA, para a adquisición de equipamentos necesarios para a restauración da biodiversidade e dos ecosistemas mariños mediante medidas de conservación no marco de actividades marisqueiras sustentables.
Beneficiarios
Poderán ser beneficiarias destas axudas as seguintes entidades, sempre que teñan a súa sede social na Comunidade Autónoma de Galicia:
- Confrarías de pescadores.
- Organizacións de produtores pesqueiros.
- Entidades asociativas xuridicamente recoñecidas e constituídas por profesionais do sector pesqueiro.
- Entidades sen ánimo de lucro integradas exclusivamente polas confrarías de pescadores.
Actividades subvencionables
Poderán concederse subvencións para os gastos de adquisición de equipos mecánicos tractores e de material necesario para desenvolver as accións de rexeneración nos bancos marisqueiros, sempre que sexan necesarios para a execución dos seguintes proxectos:
- Adquisición de vehículos tractores para a realización de tarefas de rexeneración.
- Adquisición de elementos remolcadores para remoción e aradura en zonas de produción de moluscos.
- Motocultores ou elementos de aradura mecánicos.
Os gastos subvencionables son os custos efectivamente asumidos pola entidade perceptora da subvención e que se axusten aos seguintes requisitos xerais:
- Que se efectuasen ao longo da duración da acción ou proxecto.
- Que fosen pagados pola entidade beneficiaria con anterioridade á finalización do prazo de xustificación e respondan de maneira indubidable á natureza da operación subvencionada.
- Que se consignasen no orzamento estimado total do proxecto.
- Que sexan necesarios para a execución das actuacións obxecto da subvención. Que sexan identificables e verificables, e en particular que consten na contabilidade do beneficiario e se inscribisen de acordo coas normas contables e de conformidade coas prácticas contables habituais do beneficiario en materia de gastos.
- Que cumpran co disposto na lexislación fiscal e social aplicable.
- Que sexan razoables e xustificados e cumpran co principio de boa xestión financeira, en especial no referente á economía e á relación custo/eficacia.
Consideraranse subvencionables os gastos realizados e pagados entre o 1 de xaneiro e o 30 de novembro de 2026
Contía
Para a concesión destas subvencións destinarase un crédito total de 4.000.000€ na presente anualidade.
Este crédito podería ampliarse en función das dispoñibilidades orzamentarias sen ter que abrir un novo prazo de presentación de solicitudes.
As porcentaxes de cofinanciamento das axudas son o 70 % con fondos FEMPA e o 30 % con fondos da Comunidade Autónoma de Galicia.
Prazo
Do 26 de setembro ao 26 de outubro de 2026.