A finalidade do programa ES-Transforma é apoiar a transformación en cooperativas ou sociedades laborais dos negocios sen remuda xeracional, de todo tipo de sociedades, incluídas as cooperativas xuvenís, e as persoas traballadoras autónomas, que xa estivesen a exercer unha actividade económica. As axudas van dirixidas a facilitarlle á nova empresa a liquidez necesaria para realizar investimentos, contratar asesoramentos ou servizos especializados enfocados á profesionalización e ao desenvolvemento estratéxico, e/ou cubrir gastos correntes de inicio da actividade.
Beneficiarios
Poden acollerse ás axudas establecidas nesta orde as cooperativas e sociedades laborais creadas nos tres anos anteriores á data da presentación da solicitude, cando xurdan dalgún dos seguintes procesos:
- Constitución por ausencia de remuda xeracional: constitución dunha sociedade laboral ou dunha cooperativa, debidamente inscritas no rexistro correspondente na data da solicitude, integradas total ou parcialmente polas persoas traballadoras cuxos contratos resultasen extinguidos por causa de crise ou xubilación da súa persoa empregadora.
- Constitución por persoas autónomas: constitución dunha sociedade laboral ou dunha cooperativa, debidamente inscritas no rexistro correspondente na data da solicitude, integradas por persoas traballadoras autónomas que xa estivesen a realizar unha actividade laboral e estean como autónomas na Seguridade Social ou na mutualidade do colexio profesional.
- Constitución por transformación de todo tipo de sociedades en cooperativas ou sociedades laborais ou pola adquisición da totalidade do capital integrante dunha sociedade mediante compravenda das súas participacións ou accións por parte das súas persoas traballadoras, coa finalidade de transformala nunha sociedade laboral ou nunha cooperativa.
Conceptos subvencionables
Poderán ser subvencionables os seguintes gastos:
- Asesoramento legal para a constitución da cooperativa ou da sociedade laboral ou para a transformación nunha destas entidades de economía social. Os gastos de rexistro, notaría e os informes legamente preceptivos para o proceso de transformación.
- Creación e desenvolvemento da imaxe corporativa.
- Obtención de certificacións de calidade.
- Márketing, comunicación ou relanzamento comercial.
- Plan de protección de datos.
- Equipamento informático.
- Adquisición e desenvolvemento de software e páxinas web.
- Mellora na eficiencia enerxética.
- Adquisición de equipamento.
- Reforma do local de negocio.
- Mobiliario.
- Elementos de transporte.
- Alugamento do local do centro de traballo.
- Seguro de responsabilidade civil e responsabilidade civil de explotación.
Contía das axudas
- Ata o 80 % do custo total dos gastos subvencionables no caso de sociedades laborais e cooperativas constituídas por ausencia de remuda xeracional.
- Ata o 60 % do custo total dos gastos subvencionables no caso de sociedades laborais e cooperativas constituídas por persoas autónomas ou por transformación doutras entidades.
En ambos casos a contía da axuda non poderá superar os seguintes límites por cada concepto de gasto:
| Conceptos | Importe máx. axuda | |
| Punto 1 | Asesoramento legal. | 4.000 € |
| Punto 2 | Creación e desenvolvemento da imaxe corporativa. | 5.000 € |
| Punto 3 | Obtención de certificacións de calidade. | 5.000 € |
| Punto 4 | Márketing, comunicación ou relanzamento comercial. | 5.000 € |
| Punto 5 | Plan de protección de datos. | 5.000 € |
| Punto 6 | Equipamento informático. | 5.000 € |
| Punto 13 | Alugamento do local do centro de traballo. | 8.000 € (max. 12 mensualidades) |
| Punto 14 | Seguro de responsabilidade civil e responsabilidade civil de explotación. | 500 € |
O límite máximo conxunto para a totalidade dos gastos será de 30.000 € por beneficiario.
Non obstante, a contía da axuda poderá incrementarse en 2.000 € por cada una das condicións que se cumpra das que se sinalan a continuación, cun máximo de 16.000 euros por solicitante:
- Sede social nun concello rural.
- Entidade formada maioritariamente por mulleres.
- As mulleres contratadas nos grupos ocupacionais se atopan subrepresentadas.
- Entidade formada maioritariamente por persoas menores de 30 anos.
- Entidade formada maioritariamente por persoas emigrantes retornadas.
- Entidade formada maioritariamente por persoas maiores de 45 anos.
- Entidade formada maioritariamente por persoas con discapacidade.
- Entidade formada maioritariamente por persoas trans.
Como resultado, a axuda total non poderá exceder os 46.000 euros.
Prazo
O prazo de solicitudes comeza o 20 de xuño de 2025 e remata o 15 de setembro de 2025 (as axudas concederanse por orde de presentación ata o esgotamento do crédito existente).
Máis información
Acceso ao procedemento de tramitación: código de procedemento: TR802R
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
Este resumo ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.