A Xunta de Galicia, a través de AGADIC, convoca estas axudas á creación escénica para o ano 2025 co obxectivo de fomentar a produción escénica en diversas disciplinas artísticas, promovendo a creatividade, a difusión e exportación de produtos culturais feitos en Galicia, a consolidación dunha industria cultural competitiva e a busca da excelencia nos produtos culturais galegos.
PERSOAS BENEFICIARIAS
Poderán acceder a estas axudas, sempre que estean dadas de alta en actividades económicas de Facenda na epígrafe 965 da sección empresarial ou nas epígrafes que van da 011 á 039 da sección artística e o seu obxectivo sexa o desenvolvemento de actividades escénicas en Galicia, as seguintes:
- Persoas autónomas.
- Persoas xurídicas privadas (SL, SA, cooperativas,…).
- Sociedades civís e comunidades de bens.
- Unións temporais de empresas.
Exclusións
Non poderán ser beneficiarias desta subvención en ningunha das súas modalidades:
- As asociacións e restantes entidades sen fins de lucro.
As persoas beneficiarias da modalidade 4 (subvencións de carácter plurianual) na convocatoria do ano 2024.
PROXECTOS SUBVENCIONABLES
Este programa de axudas conta con diferentes modalidades:
- Modalidade 1: subvencións á creación de espectáculos de empresas de nova creación.
- Modalidade 2: subvencións a creación escénica no ámbito do teatro, novo circo e maxia.
- Modalidade 3: subvencións á creación escénica no ámbito danza e artes do movemento.
- Modalidade 4: subvencións á actividade escénica de carácter plurianual.
GASTOS SUBVENCIONABLES
Serán gastos subvencionables os que respondan á natureza da actividade subvencionada, se realicen dentro do período de execución establecido e se acredite o seu pago. Así, consideraranse subvencionables:
- Os gastos de persoal.
- Os gastos de produción.
- Os gastos de promoción e publicidade.
- Os dereitos de autor.
- As axudas de custo, transporte e/ou outras indemnizacións.
- Os gastos de mantemento e xestión, ata un máximo dun 7% do custo total.
- Os gastos financeiros directamente relacionados coa actividade subvencionable.
- O alugamento de locais de ensaio, cun máximo de tres meses, excepto na modalidade 4, que son seis meses.
REQUISITOS
Este programa de axudas conta con requisitos xerais e requisitos específicos para certas modalidades.
Requisitos xerais
- A produción do proxecto subvencionado deberá iniciarse no exercicio 2025.
- No suposto de coproducións, unicamente se terá en conta para valorar os criterios relativos á empresa a entidade que figure como persoa solicitante.
- Só poderá ser obxecto de subvención un proxecto por beneficiario.
- Nas modalidades 1, 2 e 3 a estrea do proxecto será entre o 1 de abril de 2025 e o 31 de marzo de 2026.
- Na modalidade 4, a estrea será entre o 1 de abril de 2025 e o 31 de marzo de 2027.
Requisitos específicos
- Modalidade 1 (espectáculos de empresas de nova creación):
- O equipo artístico debe estar integrado polo menos nun 75% por persoas nacidas a partir do ano 1990, inclusive.
- A antigüidade da compañía non pode ser superior a cinco anos.
- Modalidade 4 (actividade escénica de carácter plurianual):
- Contar cunha actividade empresarial no sector das artes escénicas nos 10 últimos anos ininterrompidos.
- Facturación media dos dous últimos anos de 100.000 euros como mínimo, excepto no ámbito da danza, onde a cifra será de 60.000 euros como mínimo.
- Os proxectos deberán conter, como mínimo, unha produción e un plan de xira de 70 funcións tanto en Galicia no exterior. Dentro deste plan de xira, polo menos 15 funcións corresponderán a unha das producións do proxecto subvencionado.
- No ámbito da danza e artes do movemento, o plan de xira será dun mínimo de 50 funcións e polo menos 10 delas corresponderán a unha das producións do proxecto subvencionado.
- As producións que formen parte do proxecto subvencionado desta modalidade poderán presentarse de forma individual ás outras modalidades desta convocatoria.
- Nesta modalidade subvencionaranse unicamente tres persoas solicitantes con proxectos escénicos durante os anos 2025 a 2027.
CONTÍAS
| Modalidade | Orzamento máximo por modalidade | Orzamento máximo por proxecto e modalidade | Límite da subvención sobre o orzamento | Contía máxima de subvención |
|---|---|---|---|---|
| Modalidade 1: nova creación | 70.000€ | 20.000€ | 90% | 18.000€ |
| Modalidade 2: creación escénica teatro, novo circo e maxia | 400.000€ | 80.000€ | 75% | 60.000€ |
| Modalidade 3: danza e artes do movemento | 100.000€ | 50.000€ | 75% | 37.500€ |
| Modalidade 4: actividade escénica plurianual | 300.000€ | 150.000€ | 80% | 100.000€ |
Axudas suxeitas ao réxime de minimis (máximo 300.000 € por empresa nos tres anos previos).
PRAZO
O prazo para a presentación de solicitudes finaliza o 17 de xaneiro de 2025.
MÁIS INFORMACIÓN
- Código de procedemento: CT403B.
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Servizo de Asesoramento a Emprendedores (SAE), chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituír a información proporcionada nos documentos oficiais.